WAKUFUNZI WA SENSA WAASWA KUDUMISHA WELEDI NA UADILIFU

Posted on: July 22nd, 2022

Wakufunzi wa Sensa ya Watu na Makazi mwaka 2022 ngazi ya Mkoa wametakiwa kutanguliza uzalendo, weledi  na uadilifu katika kazi wanayoifanya ili iweze kulisaidia Taifa kufikia malengo yaliyowekwa  huku wakiacha alama iliyotukuka katika utendaji kazi.

Akikagua mafunzo ya mazoezi kwa vitendo yanayofanywa na  Wakufunzi wa Sensa hiyo katika Kata ya Kidahwe Wilaya ya  Kigoma Vijijini, Mkuu wa Mkoa wa Kigoma Kamishna Mstaafu wa Jeshi la Zimamoto na Uokoaji, Thobias Andengenye  amewasisitiza kuifanya kazi hiyo kwa ukamilifu ili kuepuka kujitokeza kwa dosari zozote.

Amesema ameridhishwa na Mafunzo yaliyotolewa kutokana na  Wanamafunzo  kuonesha uwezo mkubwa kwenye mazoezi ya vitendo, huku akiwaasa kuhakikisha zoezi litakapoanza taarifa zitakazohitajika zijazwe kwa usahihi na ukamilifu.

Aidha, amewasihi kuheshimu Mila na Desturi za wakazi wakati wa utekelezaji wa zoezi hilo ili kudumisha mahusiano mema baina yao na wananchi ambao ndio walengwa wakuu wa zoezi hilo hali itakayoruhusu upatikanaji wa taarifa zinazohitajika kwa urahisi na usahihi.

Mafunzo hayo yamelenga kupima uelewa wa wakufunzi hao kutokana na mafunzo ya nadharia waliyoyapata  pamoja na kupima ufanisi wa viendea kazi ili kubaini changamoto zinazoweza kujitokeza kabla ya kuanza kwa mafunzo ya Makarani wa Sensa na zoezi zima la Sensa ya Watu na Makazi ya Mwaka 2022.