UJENZI MIRADI YA SERIKALI UZINGATIE MIONGOZO-GERARUMA

Posted on: September 28th, 2022

Kiongozi wa Mbio za Mwenge wa Uhuru kitaifa 2022 Sahili Geraruma  amewataka Wataalam  wa Serikali wenye dhamana ya kusimamia  utekelezaji wa Miradi ya Maendeleo, kuzingatia Taratibu na miongozo inayotolewa  na  Serikali katika utendaji kazi wao.

Geraruma aliyasema hayo wakati akizindua mradi wa  vyumba sita vya Madarasa katika Shule ya Sekondari Nyanganga iliyopo wilayani Uvinza Mkoani hapa, ambapo Kiongozi huyo wa Mbio za Mwenge alimtaka Mhandisi anayesimamia ujenzi wa mradi huo kuzingatia michoro ya majengo inayotolewa na Serikali.

‘‘Nakushauri Mhandisi pamoja na wataalam wengine mnaosimamia kazi za ujenzi hapa, muache kukaa ofisini na badala yake mfike maeneo inakotekelezwa miradi ya Ujenzi ili kubaini na kuzifanyia kazi  dosari zinazoweza kujitokeza wakati ujenzi ukiendelea’’ Alisema Geraruma.

Aidha kiongozi huyo wa Mbio za Mwenge, alikubali kuzindua Mradi huo wenye Thamani ya Shilingi Milioni mia moja na Ishirini na kumuagiza Mhandisi wa Wilaya  ya Uvinza kufanya marekebisho katika maeneo yenye dosari alizozibaini.

Kapitia hotuba yake, Mkuu wa Mkoa wa Kigoma Mhe. Thobias Andengenye alisema  Mwenge  huo utakimbizwa katika Halmashauri nane, ambapo utatembelea, kuweka mawe  ya msingi pamoja na kuzindua  jumla ya miradi 51 yenye Thamani ya zaidi ya Shilingi Bil.13

Alifafanua kuwa, Mkoa ulifanya vizuri  katika zoezi la Sensa ya watu na Makazi kwa Mwaka 2022, pia umeendelea kufanya vizuri katika mapambano dhidi ya VVU/UKIMWI, Utekelezaji wa Afua za Lishe ili kukabiliana na Udumavu pamoja na Mapambano dhidi ya Malaria.

‘‘Nachukua fursa hii kuwapongeza wakimbiza Mwenge Kitaifa  kwa kazi kubwa wanayoendelea kuifanya kwani mpaka kufikia sasa  wamefanikiwa kuifikia Mikoa 29 yenye Jumla ya Halmashauri 179 na kuifikisha alama ya chombo hiki kilichoasisiwa kwa nia ya kutuunganisha’’ Alisema Andengenye.

Upande wake Waziri wa Nchi, Ofisi ya Waziri Mkuu, Kazi, Ajira, Vijana na Wenye Ulemavu Prof. Joyce Ndalichako, alisema ameridhishwa na mapokezi makubwa ya Mwenge yaliyofanyika wilayani Uvinza huku akisisitiza kuendelea kuutumia kwa kusambaza ujumbe wa kupinga rushwa, matumizi ya dawa za kulevya pamoja na kuhamasisha uzalendo.

‘‘Nawasihi tutumie Mwenge wa Uhuru kama chombo cha kujitafakari na kuchukua hatua pale tunapoona baadhi yetu wanakiuka maadili mema hali inayoweza kuharibu Amani na mshikamano uliopo katika Nchi yetu’’ alisisitiza Ndalichako.