UJENZI KITUO CHA AFYA RUKOMA KUWAONDOLEA ADHA WAKAZI KUFUATA HUDUMA ZA AFYA ZAIDI YA KM 10

Posted on: August 25th, 2025

NA. CLINTON JUSTINE-KIGOMA RS

Kukamilika kwa Ujenzi wa Kituo cha Afya Rukoma wilayani Uvinza Mkoani Kigoma kutawaondolea adha  wakazi wa kijiji hicho kutembea umbali wa zaidi ya Kilomita Kumi kufuata huduma za Afya katika Kituo cha Afya kilichopo Kata ya Buhingu wilayani humo.

Wakizungumza kwa nyakati tofauti wakazi wa Kijiji hicho wamesema kituo kitakapokamilika kitasaidia kupunguza vifo vya wanawake wajawazito, watoto na wagonjwa wenye maradhi mbalimbali kutokana na kutumia muda mfupi kufika katika kituo hicho  tofauti na sasa ambapo hulazimika kusafirisha wagonjwa wao umbali mrefu kwa kutumia usafiri wa pikipiki ili kuzifikia huduma za Afya.

“Ukamilishwaji wa kituo cha hiki utasaidia kupunguza gharama za kusafirisha wagonjw sambamba na kupunguza vifo kwa wajawazito, wazazi, watoto  na kwa wagonjwa wenye maradhi mbalimbali ’’  amesema Shabani Saidi  Afisa Mtendaji kijiji cha Rukoma.

Hamis Kasanga ambaye ni mkazi kijijini hapo amesema upatikanaji wa uhakika wa huduma za afya katika eneo hilo, utabadilisha mtazamo wa wakazi na kuwaondolea fikra na Imani za kishirikina katika kutatua changamoto zao za  kiafya kutokana na upatikanaji wa vipimo vya Afya na kuweza kubaini maradhi katika hatua za awali.

‘‘kutokana na umbali katika kuzifikia huduma za Afya na kuepuka kutumia gharama kubwa, baadhi ya wakazi wamekuwa wakitumia tiba asili na kujihusisha na waganga wa kienyeji sambamba na kutumia ramli chonganishi pale wanaposumbuliwa na maradhi’’ amesema Hamis  Kasanga.  

Upande wake Joseph Kihanda ambaye ni  mkazi wa kijiji hicho amesema kumekuwa na  changamoto za kiusalama zinazowakumba madereva wa pikipiki wanaposafirisha wagonjwa nyakati za usiku ikiwemo kuporwa vyombo vyao vya usafiri sambamba na kujeruhiwa.

Naye Tumaini Paulo ambaye ni mkazi kijijini hapo ,amesema kukamilika kwa kituo cha afya rukoma kitasaidia kuokoa maisha ya wakazi wa eneo hilo kwa  kupunguza vifo vya wajawazito na watoto wachanga

Aidha ameiomba serikali kuongeza kasi katika ukamilishwaji wa kituo hicho ili upatikanaji wa huduma uweze kuanza mara moja.