MRADI WA HEWA YA UKAA MBIONI KUANZA KIGOMA

Posted on: September 6th, 2023

M

MKUU WA MKOA WA KIGOMA AKIFAFANUA JAMBO HUKU AKISILIZWA NA WADAU WA MAENDELEO KUTOKA  TAASISI YA DANISH REFUGEE COUNCIL (DRC) WALIPOFIKA OFISINI KWAKE KWA AJILI YA KUSALIMIA KISHA KUTOA TAARIFA YA MPANGO WA UTEKELEZAJI MRADI WA HEWA YA UKAA MKOANI HAPA LEO SEPTEMBA 6, 2023.

Serikali mkoani Kigoma imeahidi kuendelea kushirikiana na wadau  mbalimbali wa Maendeleo  ili kukabiliana uharibifu wa Mazingira na Athari zake.

Hayo yamesemwa na Mkuu wa Mkoa wa Kigoma Thobias Andengenye alipokutana na Ujumbe kutoka Shirika  lisilo la kiserikali la Danish Refugee Council (DRC) kwa ajili ya kupokea Taarifa ya mpango wa jumla wa utekelezaji Mradi wa hewa Ukaa mkoani Kigoma.

Amesema katika maeneo wanayoishi wakimbizi, kumekuwa na Athari kubwa za kimazingira iliyosababishwa na ukataji  holela wa miti kwa ajili ya kuni  na Mkaa ili kupata nishati ya kupikia.

Amesisitiza kuwa, Mkoa upo tayari kuunga mkono utekelezaji wa miradi mbalimbali ya kimazingira ikiwemo upandaji wa miti, utoaji Elimu ya uhifadhi wa Mazingira pamoja na k uzalisha na kuhamasisha matumizi ya nishati mbadala.

Mkurugenzi mtedaji wa Taasisi ya DRC, Alfred Magehema amesema, Taasisi yake kwa kushirikiana na Kampuni ya Orsted ya nchini Denmark, wanatarajia kuanza kufanya utekelezaji wa Mradi wa Hewa Ukaa katika Wilaya za Kakonko, Kibondo na Kasulu ifikapo mwaka 2024.

Ameeleza kuwa, lengo la Taasisi yake ni kuhudumia wakimbizi pamoja na Jamii ya wakazi wenyeji inayoishi jirani na Kambi za wakimbizi  kwa kutekeleza miradi ya kuboresha Maisha, Uhifadhi wa Mazingira pamoja na uzalishaji nishati mbadala ya kupikia.

Magehema amefafanua kuwa Taasisi ya DRC  inaendelea kutekeleza kazi mbalimbali kwa ajili ya kuimarisha shughuli za Kilimo, kutoa mafunzo ya ufundi Stadi na mikopo kwa wanawake na vijana, kutoa huduma za kisheria, ulinzi wa mtoto pamoja na uwezeshaji kiuchumi kwa watu wenye mahitaji maalum.