MRADI WA AFYA HATUA KUONGEZA KASI MAPAMBANO DHIDI YA UKIMWI MANISPAA YA KIGOMA UJIJI

Posted on: August 18th, 2025

Na. Clinton Justin-KIGOMA

Mradi wa Afya Hatua unaotekelezwa na Mpango wa Dharura wa Rais wa Marekani wa kukabiliana na UKIMWI (PEPFAR), kupitia Kituo cha Kuthibiti na kuzuia Magonjwa Marekani (CDC), umetajwa kuwa ni miongoni mwa suluhisho  muhimu  katika kukabiliana na Virusi vya Ugonjwa wa UKIMWI Manispaa ya Kigoma Ujiji Mkoani hapa.

Mratibu wa Huduma za Afya ngazi ya Jamii  kutoka Shirika lisilo  la kiserikali Tanzania Health Protection Support (THPS) wilaya ya Kigoma mjini , Yethero Mgale amesema, mradi huo umekuwa chachu katika kuhamasisha ufuasi wa dawa za kufubaza maradhi ya UKIMWI huku akitoa wito kwa jamii kujitokeza kwa wingi kupata huduma za dawa kinga.

“Tunaomba jamii ijitokeze kwa wingi kupata huduma hizi, malengo yetu ni kuhakikisha  kwamba ifikapo mwaka 2030 ,tunatokomeza kabisa maambukizi mapya ya VVU ” ,Amesema  Yethero.

Mnufaika na mtumiaji wa dawa kinga  aina ya Post Exposure Prophylaxis (PEP),  Bi. Hadija Issa ambaye ni mkazi wa Manispaa ya Kigoma Ujiji , amewashauri wanawake wanaoishi mazingira hatarishi ambayo ni vyepesi kupata maradhi hayo, kujenga tabia ya kutumia dawa kinga  kwa ajili ya kujijengea usalama wao dhidi ya maambukizi wa virusi vya UKIMWI .

 “Wanawake wenzangu muwe na ujasiri wakutumia dawa hizi kwa ajiri ya kujikinga na maambukizi ya VVU kutoka kwa mama kwenda kwa mtoto ’’.amesema Hadija

Kupitia mradi wa Afya Hatua chini ya Shirika la (THPS), Jamii katika halmashauri hiyo  zinaendelea kuhamasishwa kuhusu umuhimu wa dawa  kinga ,upimaji wa afya na matumizi ya huduma zinazosaidia kupunguza kasi ya maaambukizi , hatuaambayo ni  muhimu kuelekea jamii yenye afya bora na isiyo na unyanyapaa.