MAKAMU WA RAIS DK. MPANGO AKAGUA MIRADI YA MAENDELEO BUHIGWE

Posted on: July 27th, 2022

Makamu wa Rais wa Jamhuri ya Muungano wa Tanzania Dk. Philip Mpango ametembelea na kukagua maendeleo ya Miradi ya Elimu na Afya inayotekelezwa  katika Kijiji cha Kasumo  wilaya ya Buhigwe Mkoani hapa.

Mh. Mpango amekagua ujenzi wa shule ya Sekondari ya wasichana Kidato cha Tano na Sita  yenye jumla ya Majengo 18 yanayojengwa kwa Thamani ya Shilingi Bilioni Moja katika kijiji hicho na kuridhishwa na kazi zinazoendelea kufanywa na mafundi pamoja na wasimamizi wa mradi huo.

Aidha, amekagua  ujenzi wa Zahanati ya Kijiji cha Kasumo unaotekelezwa kwa nguvu za wananchi kwa kushirikiana na Serikali wenye thamani ya Shilingi Milioni 133 ambao unatarajiwa kukamilika tarehe 30 Septemba 2022.

Baada ya kukagua miradi hiyo, Makamu wa Rais amewapongeza wakazi wa kijiji hicho kwa kujitolea kutekeleza mradi wa Zahanati, huku akisisitiza wanafunzi watumie fursa ya uwepo wa miundombinu ya kielimu inayoendelea kujengwa ili kujiendeleza kitaaluma na kupata wataalamu mbalimbali kwa manufaa ya Taifa.

Amewaagiza wasimamizi wa mradi wa ujenzi wa shule kupanda miti pembezoni mwa majengo ili kupendezesha na kulinda mazingira pamoja na kupunguza  Athari zinazoweza kusababishwa  na upepo mkali.

Katika hatua nyingine Makamu wa Rais amechangia jumla ya mifuko 200 ya Saruji  pamoja na kuendesha harambee iliyofanikisha kupatikana kwa mifuko 410 iliyokuwa inahitajika ili kukamilisha ujenzi wa Zahanati ya Kijiji cha Kasumo.