MAHAKAMA ZETU ZINAIMARIKA DKT. NDUMBARO

Posted on: January 25th, 2025

Waziri wa Katiba na Sheria Mhe. Dkt.  Damas Ndumbaro amesema maboresho yaliyofanywa na serikali katika utendaji kazi wa Mahakama nchini umechangia kupunguza mrundikano wa kesi  katika mahakama na kupunguza idadi ya Mahabusu katika Magereza yaliyopo mikoa yote nchini.

Waziri Ndumbaro ametoa kauli hiyo aliposhiriki Uzinduzi wa Maadhimisho ya Siku na Wiki ya Sheria kwa Mkoa wa Kigoma na kusisitiza kuwa kabla ya maboresho hayo katika magereza mengi  idadi ya mahabusu ilikuwa ni kubwa kuliko wale wanaotumikia adhabu za vifungo.

Aidha Waziri Dkt. Ndumbaro amewataka wananchi mkoani humo kuendelea kujitokeza ili kunufaika na huduma za kisheria zinazotolewa bure kupitia Kampeni ya Msaada wa kisheria ya Mama Samia aliyoizindua Januari 24, 2025 mkoani Kigoma.

Upande wake Mkuu wa Mkoa wa Kigoma Thobias Andengenye amesema kabla ya kujengwa kwa Mahakama Kuu Kanda ya Kigoma wakazi mkoani humo walilazimika kusafiri kati ya Km. 400 hadi 700 kufuata huduma hiyo mkoani Tabora, hali iliyochangia kupoteza fedha na muda.

Kupitia hotuba aliyoitoa kwenye uzinduzi wa Maadhimisho hayo, Andengenye amesema kufanyika kwa maboresho na usogezwaji wa huduma za kimahakama kunachangia kwa kiasi kikubwa wananchi kujikita katika kufanya shughuli za maendeleo badala ya kutumia muda mwingi kufuatilia mashauri yao mahakamani.

Aidha amepongeza ongezeko la matumizi ya TEHAMA katika kupokea, kusajili, kusikiliza na kutoa Hukumu kwa njia ya Mtandao jambo linalochangia  mashauri kumalizika kwa haraka na kuruhusu wananchi kuendelea na Shughuli za uzalishaji Mali.

Mkuu huyo wa mkoa ametoa wito kwa watendaji hao wa mahaka kudumisha weledi na uadilifu ili kujenga imani kwa wateja wao na kuondoa malalamiko yasiyo ya lazima dhidi ya utendaji kazi wa kimahakama.