KIGOMA YAADHIMISHA MIAKA 63 YA UHURU KWA KUFANYA USAFI NA KUPANDA MITI

Posted on: December 9th, 2024

Jamii mkoani Kigoma imeaswa kuendelea kutunza amani na mshikamano uliopo ili kudumisha utulivu hali itakayochochea Maendeleo ya Wananchi.
Wito huo umetolewa na Katibu Tawala Mkoa wa Kigoma Hassan Rugwa alipomwakilisha Mkuu wa Mkoa wa Kigoma kwenye kilele cha Maadhimisho ya Miaka 63 ya Uhuru wa Tanzania bara ambapo kimkoa maadhimisho hayo yamefanyika katika Manispaa ya Kigoma Ujiji.
Amesema kila mtu anao wajibu wa kudumisha umoja na amani ikiwa ni misingi iliyoasisiwa na baba wa Taifa Mwalimu Julius Kambarage Nyerere kwa lengo la kudumisha Maendeleo ya nchi.
Katika hatua nyingine Rugwa amehimiza jamii kuendelea kutunza mazingira ikiwa ni pamoja na kujenga utamaduni wa kupanda miti.
"Katika kutekeleza sera ya utunzaji wa Mazingira, tumejiwekea utaratibu wa  kupanda miti Mil. 1.5 kwa kila halmashauri ikiwa ni  sawa na miti Mil. 12 kimkoa kwa kila mwaka" amesema Rugwa.

Aidha katika kuadhimisha miaka 63 ya Uhuru wa Tanzania bara, Katibu Tawala Mkoa ameongoza kufanya zoezi la usafi sambamba na kuongoza wananchi kupanda miti katika eneo la Hospitali hiyo ikiwa ni katika kuhamasisha suala la utunzaji wa mazingira.