AWESO AKUTANA NA WADAU WA MAJI MANISPAA YA KIGOMA UJIJI

Posted on: July 16th, 2023

WAZIRI WA MAJI MHE. JUMA AWESO (KATIKATI) AKIWA KATIKA KIKAO CHA WADAU WA MAJI MANISPAA YA KIGOMA  UJIJI. KULIA KWAKE NI MKUU WA  MKOA  WA  KIGOMA  MHE. THOBIAS ANDENGENYE NA KUSHOTO NI KATIBU TAWALA  MKOA  WA  KIGOMA  MHE. ALBERT MSOVELA.

Waziri wa Maji Mhe. Juma Aweso (Mb) amesema Serikali ya Awamu ya Sita itaendelea kuboresha na kuimarisha Miundombinu ya Maji nchini ili kuwaondolea wananchi adha zitokanazo na changamoto ya ukosefu wa huduma hiyo.

Waziri Aweso amesema hayo alipozungumza kwenye kikao cha pamoja kilichomkutanisha na wadau wa Maji katika Manispaa ya Kigoma Ujiji mkoani Hapa.

Waziri Aweso amesema pamoja na kuendelea kuimarika kwa upatikanaji wa Huduma hiyo Mkoani Kigoma, Serikali itaendelea kuhakikisha Maji yanayopatikana ni Safi, toshelevu na yenye ubora unaostahili kwa matumizi ya binadamu.

Amefafanua kuwa, Serikali inaendelea na Mchakato wa kuhakikisha Ziwa Tanganyika linakuwa chanzo kikuu na cha uhakika cha uzalishaji wa Maji yatakayotumiwa na wakazi katika mikoa ya Kigoma, Rukwa na Katavi.

Aweso ametoa wito kwa wadau wa Maendeleo wanaotaka kuwekeza mjini Kigoma kutekeleza adhma hiyo ya kimaendeleo kutokana na utoshelevu wa Maji ambapo kwa sasa uzalishaji umefikia kiasi cha  Lita Mil. 42 huku mahitaji halisi yakiwa ni lita Mil. 23.

Pia Waziri ameielekeza Mamlaka ya Maji Safi na Usafi wa Mazingira Manispaa ya Kigoma Ujiji kutokuwa kikwazo katika zoezi la usambazaji na utoaji wa huduma nyinginezo zinazohusu Maji kwa lengo la kusogeza na kuongeza hali ya utoaji wa huduma hiyo  kwa wananchi.

Naye Mkuu wa Mkoa wa KigomaThobias Andengenye amesema Jumla ya Vijiji 306 vimepatiwa huduma ya Maji huku vingine 40 vikiwa havijafikiwa kabisa huku upatikanaji wa huduma hiyo ukipanda kutoka Asilimia 56 hadi kufikia Asilimia 67.3.

‘’Katika kukabiliana na changamoto hiyo Serikali inaendelea kutekeleza ujenzi wa miradi ya Maji 49 katika vijiji 77 ambayo inatarajia kukamilika 2025 na kusababisha ongezeko la Asilimia 17.8 ya upatiakaji wa Maji mkoani hapa’’ amesema.

Ameendelea kusema kuwa, kazi mbalimbali zimeendelea kufanyika ikiwemo kutoa Elimu na kuhamasisha utunzaji wa Mazingira na vyanzo vya maji kwa kuhamasisha upandaji wa miti rafiki kwa Mazingira.

Upande wake Meneja wa Mamlaka ya Maji Safi na Usafi wa Mazingira (KUWASA) Manispaa ya Kigoma Ujiji Poas Kilangi, amemueleza Waziri kuwa, katika Manispaa ya Kigoma Ujiji yenye kata 19 ikiwa na wateja hai wa Huduma hiyo 17, 347, mtandao wa Maji umefikia Km. 405.

Amezitaja chanagamoto zinazowakabili kiutendaji ikiwemo uchakavu wa Jengo la Ofisi, uhaba wa watumishi pamoja na kutotosheleza kwa vitendea kazi ikiwemo uhaba wa vyombo vya Usafiri.

Pia ameutaja udogo na uchakavu wa mabomba kuchangia kwa kiasi kikubwa kutopatikana  kwa huduma ya uhakika ya  maji katika baadhi ya maeneo ya Manispaa ya Kigoma Ujiji.

Aidha katika kudhibiti matumizi ya holela ya Maji, Kilangi amesema wamefanikiwa kuagiza mita za Maji 2500 na wanaendelea kuzifunga kwa wateja ili kila mtu achangie  huduma hiyo kuendana na matumizi yake.