ANDENGENYE: TUMIENI TEKNOLOJIA KUONGEZA UZALISHAJI

Posted on: August 9th, 2023

Jamii imeshauriwa kutumia mbinu na Maarifa mapya  pamoja na kujiimarisha katika matumizi ya Teknolojia  ili kuongeza  tija  katika  uzalishaji mali na kujiletea  Maendeleo.

Wito huo umetolewa  na  Mkuu wa Mkoa wa Kigoma Thobias Andengenye alipozungumza kwenye  kilele cha Maonyesho  ya Sikukuu  ya wakulima  nane nane  kanda ya Magharibi yaliyofanyika Mkoani Tabora.

Amesema jamii inapaswa kutumia zana za kisasa katika kuendesha shughuli mbalimbali za uzalishaji mali ikiwemo  matumizi ya Mashine pamoja na kujiimarishia maarifa  kiutendaji , ili kuongeza kiwango cha uzalishaji  pamoja na kupandisha thamani ya bidhaa zitakazozalishwa .

Ameeleza kuwa serikali ya Awamu ya Sita imedhamiria kukuza Sekta ya Kilimo , Mifugo na Uvuvi kwa kuanzisha  majukwaa ya uwekezaji , kuongeza Bajeti za Wizara hizo pamoja na kutekeleza miradi ya kimkakati kwenye nyanja za kiuchumi kwa lengo la kuzidi kuifunga Kanda ya Magharibi.

‘Nimefurahishwa na uwepo wa ongezeko la  Idadi ya vikundi vinavyojihusisha  na uboreshaji wa  Mnyororo wa Thamani kwa Mazao  ya Kilimo, Mifugo na Uvuvi  hivyo msisiste  kutumia fursa ya uwepo wa Masoko ya ndani na nje ya nchi kujinufaisha na kujiimarisha  kiuchumi ’ amesisitiza Andengenye.

Aidha kiongozi huyo ametoa Rai kwa wakulima kuepuka hasara kwa kuendelea kuviamini na kuvitumia vyama vya Ushirika (AMCOS) kuuza mazao kwa bei zenye tija ili kufikia malengo ya kimaendeleo waliyojiwekea.

Kadhalika Andengenye amezipongeza Taasisi pamoja na watu binafsi waliojitokeza  na kushiriki katika maonyesho hayo na kuwahimiza  kuendelea kutoa elimu na hamasa kwa wananchi ili kukuza sekta  za Kilimo, Mifugo na uvuvi ndani na nje ya Mikoa ya Tabora na Kigoma.

Kilele cha maadhimisho hayo kimefanyika katika viwanja vya ipuli Manispaa yaTtabora na kuhudhuriwa na kaimu Mkuu wa Mkoa Tabora  Peter Serukamba, Mwenyekiti wa CCM (M) Tabora , Makatibu Tawala  (M) Tabora na Kigoma , Wakuu wa wilaya , wenyeviti na wakurugenzi wa halmashauri za wilaya Tabora na Kigoma,  wawakilishi wa wizara za kilimo, mifugo na uvuvi , watendaji kutoka Ofisi za wakuu wa mikoa na wilaya Kanda ya Magharibi, Sekta binafsi, wakulima  pamoja na wajasiriamali mbalimbali katika mikoa hiyo.