RC ANDENGENYE AFUNGUA KIKAO KAZI CHA VIONGOZI WA MKOA NA WILAYA KUPOKEA TAARIFA UTEKELEZAJI MRADI WA TASAF

Posted on: June 11th, 2024

Waratibu wa Mpango wa kunusuru kaya Masikini kupitia Mfuko  wa Maendeleo ya Jamii (TASAF)  mkoani Kigoma wametakiwa kuwajengea uwezo wanufaika wa mradi huo ili waweze kufuzu na kumudu kujitegemea kiuchumi kwa lengo la kuachana na utegemezi wa mfuko huo katika kuendesha maisha yao.

Wito huo umetolewa na Mkuu wa Mkoa wa Kigoma Thobias Andengenye alipozungumza wakati akifungua Kikao kazi cha Viongozi wa Mkoa na Wilaya kilichofanyika mjini Kasulu na kusisitiza kuwa wanufaika wanapaswa kutumia fedha wanazozipata kuibua miradi itakayowafanya waweze kujitegemea.

Amesema wanufaika wanapofikia hatua ya kufuzu na kuanza kujitegemea, wanatoa fursa kwa au kukosa nafasi katika mpango wa awali  kutoa fursa kwa wahitaji wapya ili kuongeza idadi ya watanzania watakaoguswa na huduma za mfuko huo.

Ameeleza kuwa, sambamba na kuwajengea uwezo wanufaika, watendaji hao wanapaswa kupiga hatua zaidi  kwa kuijengea uelewa jamii kwa ujumla wake kuhusu utekelezaji wa mradi huo kwa kutoa taarifa kuhusu hatua mbalimbali zinazofikiwa.

Amewasisitiza wajumbe wa kikao hicho kuhakikisha wanakuwa ni sehemu ya utekelezaji kwa sambamba na kutoka na majibu  pale ambapo jamii itahitaji majibu kuhusu  hatua mbalimbali za utekelezaji mradi sambamba na taratibu zinazoongoza katika kutoa maamuzi.

Kikao hiki kitatupatia dira mpya na kuwezesha kila mmoja wetu kuwa mwalimu na sehemu  ya utatuzi wa changamoto wanazokutana nazo wananchi kuhusu hatua mbalumbali za utekelezaji wa mradi.